مات في بلدنا خمسه
راحوا في لحظه وهمسه
الاول كان امير
والتاني كان غفير
والتالت شيخ كبير
والرابع شاب صغير
والخامس ده الضمير
سالني اخويا وقال
متقولي ايه الحكايه
ايه قصة ده وده
وايه هي الروايه
اما الأول ياسيدي
كان لبلدنا الأمير
يظلم ده وده
وناسي الرب الكبير
يضحك بكل فيه
ويظلم ناس كتير
ويقول دي دنيا واحده
هعيشها انا سفير
هظلم ده وده
وهسرق ده وده
وفي طيارتي هطير
وقبل ما يجي الميعاد
سبقه رب العباد
والقبر كان المصير
اما بقي التاني
هي قصة غفير
عايش في الدنيا وحده
ويقول ويعلي صوته
مش فيه ابدا تغيير
يشوف حرامي يجري
ولا يصحى فيه ضمير
ويقول مالي وماله
خلي سره في بير
وفي يوم كان يا مكان
صاحبنا كان تعبان
علي بيته راح حرامي
ومسدسه كان عمران
قال ايه راح يسرقه
وفجأه شاف الحرامي
غفيرنا على السرير
قاله سيبني انا غلبان
ومش امير
جاي تسرق بيتي ليه
انا ليك ستر كبير
قاله ده كان زمان
وضربه بالرصاص
وسابه وذي زمان
يا فكيك
عشان يبقى في امان
اما التالت يا خويا
حكاية شيخ كبير
عاش وشاف كتير
مش عارف ماله ده
اتغر بعمره الطويل
مشفش اصحابه ماتوا
ولا هو عويل
يا شيخ مهما العمر طال
فدوام الحال محال
يا شيخ فات الآوان
والتوبه كان زمان
مش وقت طلوع الروح
يا روح ما بعدك روح
دلوقتي كلك جروح
يا شيخ خلاص بقي
القبرالملتقي
اما بقي يا سيدي
الرابع كان زميلي
شاب
في عمر جيلي
كان في الدنيا همه
شله ولمه حلوه
وكان لو حد زمه
يقول الدنيا حلوه
وكان بيقول كمان
ده زماني والمكان
هعيشه مهما كان
وحياتي انا هقضيها
وفي مرة قلتله
يا بني وفين صلاتك
قال ايه قالي دماغك
العمر لسه طويل
قلتله يا بني وبكره
محدش على فكره
عارف ايه الحال
قالي كبر....وعيش
ده كلام ميجبس همه
متشغلش بيه البال
وفجأه
سمعتهم بينادوا جريت
قالوا فلان ده مات
قلت ازاي وفين
قالوا كانت حريقه
وكان هو جوه البيت
أما الخامس يا اخويا
ضمير.........
ضمير فينا ومات
وجرح وذكريات
بنعصي بالساعات
ونفوق في الأزمات
هي الخلاصه........
زي ما قالوا زمان
خلاصة الحكايه
ان احنا مهما كان
مهما عشنا ومهما
طال بينا الزمان
هي كل الروايه
طريق من البدايه
معروفه ليه النهايه
مقدرش اقول غير انك جبت الخلاصه
ردحذفأحييك بجد
فكره البوست راائعه
ميرسي جداااااااااااا
ردحذفالأروع مرورك الجميل
اكثر من رائعة ........وصورة فوتوغرافية لكل ما يحدث فعلا
ردحذفأنا آسف لتأخير ردي
ردحذفمكنتش بدخل بسبب ظروف
اسعدني مرورك جداااااااااااا