ريشه وحباره
هكتب حكاية وطن
ولا حكاية جيل
ولا حكاية شاب
كان حلمه سهل يسير
كان حلمه يوم ما اتولد
انه يشوف الخير
انه يشوف العدل
وينتهي التضليل
كان حلمه يبقي الأمل
علي الجبين مكتوب
كان حلمه يبقي المستحيل
من القاموس مشطوب
كان حلمه لما يفكر
من ذنبه انه يتوب
يلقي مليون ايد
بتقوله يلا نتوب
ريشه وحباره
والحبر أصبح دم
والريشه من عضم
الفقير تتلم
والظلم سايد في البلاد
ناشر معاه الغم
دي كلمة المساكين
يلا يا ابن العم
ثورة لمليون جيل
ثورة وطن
ياما شال الهم
ريشه وحباره
بكتب بدمعي علي
الأراضي وفي السما
بكتب وامتي
صوتي يوصل محكمه
تحكم علي عباره
غرقت في البحار المظلمه
أو قطر ركابه غلابه
ياما شافوا العمي
او ظلم ساد
وشباب يضيعوا
في ظروف غامضه
واهو كل هم
وفي الملفات اترمي
ريشه وحباره
منعونا نكتب
والحلم حتي بيسلبوه منا
منعونا نعشق
والعشق مات
هما اللي ظالمينا
منعونا حتي نقول
بكره أكيد أحسن
حتي الأمل قتلوه
في طفل بيتولد
علي الخوف بقوا يربوه
زرعوا في قلبه الكره
ودي آخرة اللي جنوه
هما اللي ظلمونا
هما اللي جرحونا
هما اللي قتلونا
ولما فاض بينا
بيقولوا ليه ومن ايه
كنا عملنا ايه
الناس دي مجنونه
ولا دي عايشه الدور
الأمه فاض بيها
وجه عليكم الدور
بقينا احنا الحكم
وانتم في ملعبنا
علي قانونا هتمشوا
أو سيبوا ملعبنا
وكارتنا الأحمر
جاهز اهه
ومرفوع
وده منا كان انذار
من قلب
عاش موجوع
لكن اللي
جاي هيفوق
والا......
الحكم ما فيه رجوع
ليست هناك تعليقات:
إرسال تعليق